احتياطات نزلات البرد والانفلونزا مع مرضي الضغط والأمراض المزمنه
مع تغييرات الفصول وانتشار العدوى الفيروسية، بيواجه كتير من الناس أعراض زي الزكام، الكحة، والتعب العام. لكن في سؤال بييجي في بال كتير من المرضى: هل اللي عندي ده نزلة برد عادية؟ ولا إنفلونزا؟
وخصوصًا لو أنا مريض ضغط أو عندي مرض مزمن، هل أقدر آخد أي دواء؟
في المقال ده هنعرف الفرق بين نزلات البرد والإنفلونزا، وإيه الأدوية اللي لازم ناخد بالنا منها، خصوصًا لمرضى الضغط والسكري والقلب.
-------------------------------------------
إزاي نفرّق بين البرد والإنفلونزا؟
نزلات البرد بتبدأ تدريجي، يعني المريض يحس بوجع بسيط في الزور، بعدين رشح أو انسداد في الأنف، وعطس، ويمكن كحة بسيطة. الحرارة عادة ما تكون خفيفة أو مش موجودة، والتعب العام بيكون بسيط.
أما الإنفلونزا، فبتظهر فجأة، وبتكون أشد. المريض بيحس بحرارة عالية، صداع قوي، تعب وإرهاق شديد، وأحيانًا آلام في العضلات والمفاصل، والكحة بتكون ناشفة ومزعجة.
ليه مرضى الضغط والأمراض المزمنة لازم ياخدوا بالهم من أدوية البرد؟
بعض أدوية البرد، خاصة اللي فيها مزيلات احتقان، بتسبب انقباض في الأوعية الدموية، وده ممكن يرفع الضغط أو يعمل خفقان في القلب. كمان في أدوية بتتفاعل مع أدوية الضغط أو السكر، وده ممكن يعرض المريض لمضاعفات خطيرة.
أدوية البرد اللي لازم مرضى الضغط يتجنبوها
أشهر مادة لازم نتجنبها هي "سودوإفيدرين" لأنها بترفع الضغط وبتزيد ضربات القلب. ودي موجودة في أدوية كتير مشهورة بتتباع من غير وصفة طبية، زي كونجيستال وأكتيفيد.
كمان مادة "فينيل إفرين" الموجودة في بعض أدوية الإنفلونزا ممكن يكون لها نفس التأثير.
كمان بعض المسكنات زي "ديكلوفيناك" ممكن ترفع الضغط أو تأثر على الكلى، وده بيكون خطر على مرضى الضغط أو القلب أو السكر.
أفضل علاجات البرد الآمنة لمرضى الضغط والأمراض المزمنة
لما يكون المريض عنده ضغط أو مرض مزمن، الأفضل يعتمد على علاجات آمنة وتكون تحت إشراف الصيدلي أو الطبيب. ومن أهمها:
باراسيتامول (زي بنادول أو سيتال): آمن لتقليل الحرارة وتسكين الألم.
مضادات الهستامين الخفيفة زي "لوراتادين" أو "سيتريزين": بتساعد في تقليل الرشح والاحتقان بدون تأثير كبير على الضغط.
بخاخ أو محلول ملحي للأنف: ممتاز لتقليل الاحتقان وفتح مجرى التنفس.
السوائل الدافئة والراحة: من أساسيات العلاج وتساعد الجسم يقاوم الفيروس بشكل أسرع.
عسل مع ليمون أو زعتر: مفيد لتهدئة الكحة ومناسب لكتير من المرضى، لكن مرضى السكر لازم ينتبهوا للكمية.
في بعض الحالات ممكن نستخدم شراب للكحة خالي من مزيلات الاحتقان، أو أدوية مركبة لكن خالية من السودوإفيدرين، وده لازم يكون تحت إشراف الصيدلي عشان نختار النوع المناسب حسب حالة المريض
أكتر حاجة نقدر نساعد بيها مرضانا هي إننا نوجههم للدواء المناسب لحالتهم، وخصوصًا في وقت انتشار العدوى. مريض الضغط أو السكر أو القلب لازم ميخدش أي دواء برد من نفسه، حتى لو الدواء ده "منتشر" أو "كل الناس بتاخده"، لأن اللي ينفع شخص ممكن يضر غيره.
دورنا في صيدلي يساعدك مهم جدًا في التوعية، وتقديم البديل الآمن، والمتابعة لو حصل أي أعراض غير مرغوبة
