افهم مرضك .. ارتفاع ضغط الدم
هل بتحس بصداع بيروّح ويرجع؟
بتقيس ضغطك وبتلاقيه عالي؟
بتاخد دوا بس مش فاهم هو بيشتغل إزاي؟
لو أي إجابة كانت "آه"، المقال ده ليك!
يعني إيه ضغط دم؟
تخيل إن قلبك هو المضخة، والدم هو المية اللي ماشية في شبكة مواسير جوه جسمك.
ضغط الدم هو القوة اللي القلب بيضخ بيها الدم علشان يوصل لأعضاءك.
لو الضغط زاد عن الطبيعي؟
المواسير (يعني الشرايين) ممكن تتأثر وتتلف مع الوقت.
ولو قل عن الطبيعي؟
الدم مش هيوصل كويس للمخ وباقي الجسم، وده يسبب دوخة وضعف.
علشان كده لازم الضغط يفضل في المستوى المظبوط – لا عالي ولا واطي.
طيب يعني إيه "ضغط عالي"؟
لما نسمع أرقام زي 140/90 أو أكتر – ده معناه إن الدم بيضغط جامد على الشرايين، وده خطر.
الأرقام دي معناها إيه؟
الرقم الكبير (الانقباضي): وقت انقباض القلب
الرقم الصغير (الانبساطي): وقت راحته
الاتنين مهمين، وزيادتهم مش هزار.
ليه بيحصل؟ أسباب كتير جدًا:
وراثة – لو في العيلة، خليك واخد بالك
ملح كتير – عدوك الأول!
قلة الحركة – جسمك محتاج يتحرك
توتر وعصبية
تدخين وكافيين بزيادة
أمراض تانية – زي الكلى أو الغدة الدرقية
الأعراض
مش دايمًا واضحة بس أشهرها!
صداع (خصوصًا ورا الرأس)
دوخة
زغللة
ضربات قلب سريعة
إحساس بالخنقة أو ضيق نفس
لكن خلي بالك... ممكن يكون مالوش أعراض خالص!
علشان كده بيسموه: القاتل الصامت
إزاي أعرف إني مريض ضغط؟
التشخيص خطوة بخطوة
ناس كتير بتقيس الضغط مرة واحدة في الصيدلية أو عند حد من قرايبهم، ويطلع عالي، فيقلقوا. بس الحقيقة إن التشخيص محتاج أكتر من قراءة.
التشخيص الصح لازم:
قياسات متعددة في أوقات مختلفة
يكون الشخص مرتاح قبل القياس بـ 5 دقايق
الذراع في مستوى القلب، والجسم في وضع مريح
لو الضغط طلع أعلى من 140/90 أكتر من مرة، الدكتور يبدأ يشك.
التحاليل المطلوبة لمريض الضغط:
1. وظائف كلى:
كرياتينين ويوريا
تحليل بول لنسبة البروتين (Albumin/Creatinine Ratio)
2. دهون وكوليسترول (Lipid Profile):
نعرف حالة الشرايين
3. سكر صايم أو تراكمي:
علشان نكشف لو في سكر مرافق
4. وظائف الغدة الدرقية (TSH - T3 - T4):
بنستبعد مشاكل الغدة
5. رسم قلب (ECG):
يطمننا على عضلة القلب
لو اتشخصنا – نعمل إيه؟
1. نغيّر أسلوب حياتنا:
نقلل الملح
نمشي كل يوم
نخس لو في وزن زائد
نبعد عن التدخين
نقلل القهوة
نهدى نفسنا ونقلل التوتر
2. العلاج الدوائي:
مدرات البول (تقلل السوائل): زي الإنداباميد
محصرات بيتا (تهدي القلب): زي البيسوبرولول
مثبطات ACE: زي الإينالابريل
ARBs: زي اللوسارتان
محصرات الكالسيوم: زي الأملوديبين
الدكتور هو اللي بيحدد أنسب تركيبة حسب حالتك مينفعش تاخد دواء بدون الرجوع للطبيب .
نصيحة من صيدلي يساعدك:
خليك ملتزم بالدواء حتى لو الضغط اتحسن
قيس الضغط بانتظام وسجّل القراءات
ما توقفش الدوا من نفسك
راجع الدكتور لو في أي أعراض غريبة
الخلاصة
ارتفاع الضغط مش بسيط، لكن التعامل معاه ممكن جدًا.
افهم جسمك، اتابع مع دكتورك، وخلي صيدليك دايمًا جنبك.
صيدلي يساعدك – دايمًا معاك... خطوة بخطوة.